Niadtong Tuiga

Poetry by | January 25, 2009

(Paghinumdum sa 2008)

Maniradug tarung sa balay
Sukna sa iyang mama kanunay
Samtang wa pa sila naabot
Lisod na kuno ang panahon karon
Ang kinaiya sa tawo dili kakumpyansahan
Bisan unsa na lang ang buhaton
Aron lang gayud makalingkawas
Sa nagmantinir nga kahimtang

Dihang sayo sa buntag
Nasiplatan na niya ang linya
Sa mga uyamot diha sa rolling store
Naghulat makabahin sa barato
Apan bug-at gihapong palaliton
Sa mubong panahon
Sagunson ang pag-usbaw
Sa presyo sa kalan-on

Pait kay krisis
Sagad sa iyang nabati
Kutob na lang sa pagpanghupaw
Dayon bagutbot
Tagawtaw sa sentimyento
Ngadto sa katawhan
Sa gobyerno lahos sa langit
Way luna ang badlis sa palad

Sa pagpanuktok sa pultahan
Nakapasalig siya nga iyang ginikanan
Apan way pagduha-duhang misugat
Ang lahing mga panagway
Dungan sa pagduslak ug mahait
Sa way pamilok nahanaw ang mga bililhon
Uban sa pagbati sa kasakit
Nawad-an siya ug paglaum

—-
James Roy Pascual studies accountancy at the Ateneo de Davao University.