Ang Kinabuhi sa Usa ka Minyo

Play by , | September 28, 2014

Mga Magdudula:

Sarah – 25 anyos, dalaga

Myrna – 25 anyos, minyo

Hugna: Sa usa ka bar, naghulat si Sarah sa iyang barkada na si Myrna. Nagalingkod si Sarah sa ilang kanunayng puwesto, adunay lamesa sa tunga sa duha ka magkaatbang nga bangko. Naay duha ka menu sa lamesa. Alas otso ilang sabot apan mag alas otso y media na, wala lang gihapon si Myrna. Mga pipila ka minuto, miabot si Myrna.

MYRNA: Ganina ra ka ‘Day? (milingkod sa atbang ni Sarah) Sorry, I’m late. Nag-ilis pa kog lampin ni JR.

SARAH: (nikatawa) Lagi. Klaro man. Medyo nanimaho pa gani ka’g tae, Girl.

MYRNA: Tse! Suya lang ka. Buotan kayo ang akong JR uy kay natulog na gyud siya para makaadto na ko dinhi..

SARAH: Oh siya siya. Mag order sa daw ta noh.

MYRNA: Unsa man ni ilang menu uy. Puro man sad burger ug fries, klase-klase ray tawag. Maayo pa akong niluto sa balay.

SARAH: Char uy! Diha ka? Kanus-a pa ka natuon ug luto, girl?

MYRNA: Sus! Abi nimo, ‘Day, pag naa na kay pamilya, sa ilaha na nimo ihatag ang tanan nimong oras ug tanan ilang kinahanglan kay imong ihatag. Sa balay namo karon, mumata gyud ko matag alas-kwatro sa kadlawon, maunhan pa nako ang tugaok sa manok ana ha, aron mag andam sa mga kinahanglanon sa balay. Gikan sa pag andam sa balon ni Inday, ni Ton-ton ug sa akong pinakabuotang bana. Unya usahay pa gyud ha, ginabuhat nako samtang gahilak si JR. Mura kog si superwoman. Grabe akong natun-an sukad nagminyo ko. Unya, sayo pa lang, gwapo na kayo akong adlaw.

SARAH: Diha ka? (giduol ang iyang nawong pagtan-aw kay MYRNA) Perfect pud kaayo nang imong eyebags? Pastilan dolor, girl! Haggardo Versoza kaayo ka’g nawong! Parehas ra ta ug edad ha, pero myghad! Murag mas blooming pa man gyud ko kesa sa imo. Wa gyud koy nakita bisan anino sa imong kalipay.

MYRNA: (nibalik ug tan-aw sa menu) Unsa kaha lami i-order diri? Murag lami lagi ning burger nila.

SARAH: Kung gusto ka makahibalo kung unsa ang gwapo nga kinabuhi, ako ang perfect example ana. Daghan kaayo ko ug boylet pero wala mi’y labels. Walay attachment para dili complicated among relationship. Naa si Brando, si Jeffrey, ug naa pa pud si Papa Charles!

MYRNA: Hmm! Unya, paghuman, kinsa man imong ulian?

SARAH: Di man ko sigurado kung unsa akong i-order oy.

MYRNA: Dah. Mas maayo lagi ning minyo kay sigurado jud ang kinabuhi. Naa pa kay pamilya nga ulian nimo kada adlaw. Wala na kay lahing buhaton kundi mag-alaga sa imong mga anak. Di na nimo kinahanglan magtrabaho. Naa bitaw ang asawa. Happy kaayo ang life!

SARAH: (gibutang ang menu) Ambot nimo uy. Dali ra gyud ka mabiyaan sa imong bana ana ba.

MYRNA: Ha? Ngano man daw be? Ginabuhat man nako ang tanan nga dapat buhaton sa usa ka asawa sa iyahang bana ug mga anak.Dili jud na mahitabo. Nagpramis baya mi atong gikasal mi nga “Till death do us part.”.

SARAH: Pagmata, Girl uy! Alangan. Huna-hunaa ra gud. Kung siya lang ang naay trabaho,

magsalig gyud ka niya. Wala kay imuha lang. Ug kanang “till death do us part” nga na, dali ra na ingnon pero lisod buhaton.

MYRNA: (nibalik ug tan-aw sa menu) Lami kaha ni ilang meatballs?

SARAH: Samot gyud kag ka losyang ana. Tan-awa ra gud imong kaugalingon. Baynte singko anyos pa ka, mura na kag trayntay singko! Wala na kay ginabuhat kundi magtrabaho sa inyong balay whole day unya pagkagabii, mudulog sa imong bana. Awa lagi ba. Sunod natong kita ani, madungagan na’g napulo ka tuig imong edad.

MYRNA: Ka-lami ra sa life ug sa pagkaon dinhi.

SARAH: Ha? Sex ra’y lami ana oy! Oh, unsa man atong i-order?

MYRNA: Kaning spaghetti na lang.

SARAH: Ay shit! Nakalimot ko. Naa diay koy spaghetti sa ref. Sayanga ato uy. Kapoy baya magluto ato. Pan-os na to ‘ron ba. Wala man gud nako nabantayan. Abi nakog okay pa siya. Bisag unsaon gyud nimo pagpreserve sa pagkaon, mapan-os gyud kadugayan ba.

MYRNA: (nihilak ug kalit) Day! Dili man gyud ko lipay ba. Mao ganing naa ko diri karon. Sa tinuod lang, nag-away man gud mi sa akong bana ba. Wala daw nako natarong ug plantsa iyang polo. Grabe kaayo uy. Unya naa pa tong kas-a nga napan-osan sad mi ug sud-an sa ref, suko kaayo siya. Ngano bitawng dili niya kaonon pag abot niya gikan sa trabaho. Grabe kaayo siya maka-yawyaw. Murag tanan na lang akong mali. Ginakapoy na ko sa akong kinabuhi.Kada-adlaw, pag mata nako sa buntag, gusto ko mag impake unya mulayas na lang ug pinakalit. Gusto lang man gyud nako isipon ba na nindot kaayo akong kinabuhi ron.

SARAH: Oh tama na. Ayaw na paghilak. Unya, unsaon man nimo na ron?

MYRNA: (gipahiran ug panyo ang mga mata) Ah gikapoy na gyud ko ‘Day. Bahala na to sila

tanan didto. Wala na ko’y labot.

SARAH: Unsa man, mulayas ka? Unya, ug galing man, asa man ka mag-stay?

MYRNA: Kanang, pwede ko sa imong boarding house, ‘Day?

SARAH: Okay. Sige. Paghuman nato ug kaon, manguli na ta didto. Pag order sa dira. Mangihi sa ko. (nigawas si SARAH)

(nitingog ang cellphone ni MYRNA)

MYRNA: Hello? Dili nako mubalik dira. Mulayas na ko. Tutal, ikaw lang man ang tama sa atong duha. Dili nako mubalik! Bahala ka. (naminaw) Sure ka? Oh? Ako lang imong love? (ginakilig) Buhaton nimo to pag balik nako diha? Ikaw gyud ba. Sige, Hon. Pauli na ko. Sige, sige. Mga ten minutes naa na ko diha. Magpalit sa ko ug paborito nimong liog sa manok. Sige. Bye. Love you pud! (nagdali-dali ug gawas si MYRNA)


Jecia and Izzy are both senior students taking up BA English major in Creative Writing at the University of the Philippines Mindanao.