Tutoy Totoy

Poetry by | December 7, 2014

Nihilak ka ug mitalidhay.
Gitukaw mo ang mga tulog
nga pasahero kay gusto ka musupsup.

Wa paka natagbaw, gikumot-
kumot mo, misinggit, miumpak
sa kahinam sa mituyhakaw nya’ng dughan.

Mihunat siya.
Milingilingi kay nagpunay ka’g siyagit.
Mikuot siya.
Nagkagidlay sa sali nimu ug hil-os.
Mihungit siya.
Namingaw ang jeep kay ikaw nahiluna.
Naulaw siya.
Gikurambos mo ang sumpuk niya’ng dughan.
Mitan-aw siya.
Mingisi ug mihunghung… “Sige totoy pa.”


Jet is a teacher at Kong Hua School, Cagayan de Oro City.