Ang Nag-inusarang Pormula

Poetry by | April 12, 2015

Sa Iyang kamot nalalang
Ang nag-inusarang pormula
Nga nagpabutho sa kalibotan
Lakip ang kawanangan
Sulod sa unom ka adlaw.
Gikan sa mga puyang dahong
Migitib sa inahang-liso
Padulong sa mga bituong
Nagkatibulaag diha sa kahalapad
Sa langit-kagabhion. Kining tanan
Mituo, misunod, sama
Sa usa ka saad, usa ka mando.
Sa ikapitong adlaw,
Siyang,naglalang, nagpahulay
Samtang naglantaw
Sa iyang mga ginama, apan
Basin gipamaolan ba kay hangtod
Karon wala pa man nakabakod.


Si Angelito “Gil” Gomos-Nambatac, Jr migradwar sa MSU-Iligan Institute of Technology sa kursong AB English. Siya nakatampo nag balak alang sa Kabisdak ug Dagmay ug artikulog komiks sa Bisaya Magasin. Siya ang nagdumala sa bag-ong gitukod nga “Ang Lantay” (http://salantay.blogspot.com/), usa ka attempted project nga mahimong usa ka literary journal ug reference site para sa literaturang Binisayang Sinugboanon. Siya kasamtangang nagtrabaho sa City Mayor’s Office- Office of Youth Affairs sa Dakbayan sa Iligan.